名校與神童

前面寫過一篇面試故事，靈感來自家人親身經歷，說時好笑，但笑中有淚。

那天與故事中的母親聊起，她還沮喪過自己失落中秋金多寶，最慘是未及回氣又得開始下一輪行動，即再揾學校再申請再面試，可以想像她與小不點有多疲累，她說：「無辦法啦，都係想佢第日條路好行啲，無咁辛苦。」

無咁辛苦？會嗎？同日新聞報導，國泰招募機倉服務員，同樣幾千人排隊申請，迫爆鏡頭，說明競爭無時無刻存在，由嬰兒出生那一秒開始，越演越烈。

也不知道是雞先還是蛋先，名校收生制度與家長心理總是互為因果，它越難入大家越覺得馨香。今時今日明明有電腦可download打印application form，它非要各位父母排隊輪籌拿表格，在校園內外排起長長人龍，製造爭崩頭的視覺效果；家長們為表忠貞，亦紛紛擔凳仔霸頭位；另外名校間亦有競爭，搶先拔尖，提前一年進行收生面試，小孩該三歲才開始上學，結果兩歲就要識講：「我叫XXX，英文名XXXX」、媽媽叫乜名、爸爸做邊行、今朝食麵飽牛奶做早餐、頭先搭地鐵再轉小巴嚟面試、哩個係茶杯哩個係茶壺、老師請飲茶、唔洗客氣…..老實講，如果兩歲就咁醒目，一早比中大收咗讀醫啦，洗鬼嚟讀幼稚園咩！

不過此乃精英制大勢所趨，無一倖免，而且只會不斷將戰線提前，好的小學生來自好的幼稚園，好的幼兒來自好的preschool，好的preschool來自好的playgroup….如此推論，未來的神童訓練應該始自胎教，且在不久的將來我們該看到以下情况:

BB一出世，臍帶剛剪就同醫生講：「醫生唔該哂！」回頭再講：「媽咪辛苦哂！我上世投胎之前已經入咗名校申請表排期，在你肚內亦訓練有數，依家隨時ready, Let's go!」