食之無味

對上一次食之無味的經驗是這樣的:

某夜與一女性朋友到日式湯麵店晚膳。侍應上前落單，我很快便點了最愛的豬骨湯麵及前菜金菇牛肉卷。友人則把餐牌翻來覆去，似乎要做一個比一生幸福還要重大的決定。

朋友: 請問北海道湯麵有咩材料?
侍應: 主要係义燒，即係豬肉 .............
朋友: (喃喃自語)豬肉好肥，可唔可以換雞肉?
侍應: (非常友善親切地)當然可以啦。
朋友: 有咩蔬菜係裏面？
侍應: 有粟米同海帶。
朋友: (又喃喃自語)粟米我怕甜，可唔可以換其他素菜？
侍應: (依然好有耐性)無問題。
朋友: 哩度寫奶油湯底，可唔可以要清湯底?
侍應: (開始忍笑)可以可以。
朋友: 我想問你哋啲麵係咪炸嫁?
侍應: (莫名其妙)炸?我哋全部係湯麵嚟喎......................
朋友: 我意思係啲麵條係製造過程有無經過油炸處理?
侍應: (彷然大悟)啊！無，我地用嘅係拉麵。

好不容易，一張單終於落下來了。

半小時後，當我正在大快朶頤之際，朋友忽然放下筷子，看着她那碗只吃了三分一的湯麵，一邊搓着肚子一邊說:「唔! 好飽啦.............好耐都無食過咁多嘢啦!」

看着我的一碗麵，還有那一小碟前菜，我忽然覺得自己像個不知節制的大食狂。面對這麽一「上上纖下下纖」的「大家歸瘦」，如果你是我，你還有心情繼續吃嗎？